ڪراچي (اسٽاف رپورٽر)سنڌ حڪومت گل پلازا سانحي جي جاچ عدالتي ڪميشن ذريعي ڪرائڻ جو اعلان ڪري ڇڏيو، ڪراچي ۾ پريس ڪانفرنس ڪندي سينئر وزير سنڌ شرجيل ميمڻ چيو ته گل پلازا واقعي کان پوءِ سنڌ ڪابينا هڪ ڪميٽي ٺاهي. ڪميٽي ڪمشنر ڪراچي جي صدارت هيٺ ٺهيل ڪميٽي جي رپورٽ تي فيصلو ڪرڻي هئي. ڪمشنر ڪراچي پاران ٺاهيل ڪميٽي جي رپورٽ اچي چڪي آهي. اها هڪ تمام تفصيلي رپورٽ آهي ۽ ان ۾ سڀني ماڻهن جا انٽرويو شامل آهن.شرجيل ميمڻ چيو ته جڏهن واقعو پيش آيو ته عمارت ۾ 2,500 کان 2,000 ماڻهو هئا. گل پلازا جو ٻه ڀيرا حفاظتي آڊٽ ڪيو ويو پر ان تي عمل نه ڪيو ويو. سول ڊفينس ڊپارٽمينٽ 2023 کان وٺي ڪيترائي ڀيرا گل پلازا جو دورو ڪيو آهي ۽ ٻه نوٽيس جاري ڪيا آهن. سانحي ۾ 80 قيمتي جانيون ضايع ٿيون. باهه وسائڻ جي عمل دوران پاڻي جي کوٽ هئي. اسان شهيد فائر فائٽر کي سلام پيش ڪريون ٿا جنهن پنهنجي جان ڏني.