لاڙڪاڻو:(رپورٽر) لاڙڪاڻي ۾ ڪجهه ڏينهن اڳ نامعلوم ماڻهن جي فائرنگ ۾ زخمي ٿيل اقليتي نوجوان ڪراچي ۾ فوت ٿي ويو آهي۔ سنجي ڪمار کي  ڪجهه ڏينهن اڳ لاڙڪاڻه مان ايئر ايمبولينس ذريعي نازڪ حالت ۾ ڪراچي منتقل ڪيو ويو هو، جيڪو اڄ فوت ٿي ويو آهي۔ جڏهن ته لاڙڪاڻه جي سول سوسائٽي ۽ واپارين واقعي ۽ بدامني خلاف شٽر بند هڙتال ڪري جناح باغ چوڪ تي ڌرڻو هنيو آهي۔ شهر جي ريشم گهٽي، سرِيا پاڌر، شاهي بازار ۽ ٻيا ڪاروباري مرڪز بازارون مڪمل طور بند آهن۔ ڌرڻي ۾ شامل مظاهرين جو چوڻ آهي ته ڪجهه ڏينهن اڳ، هڪ ئي رات ٻن ڌار ڌار واقعن ۾ گوليون لڳڻ سبب سنجي ڪمار ۽ رونق آهوجا زخمي ٿي پيا هئا، جن مان سنجي ڪمار فوت ٿي ويو آهي، پر اڃا تائين نه ته واقعي جو ڪو ڪيس داخل ڪيو ويو آهي ۽ نه ئي پوليس ڪنهن کي گرفتار ڪيو آهي۔ شهر ۾ هر روز ٿيندڙ ڦرن ۽ ڏوهاري وارداتن شهرين کي غير محفوظ بڻائي ڇڏيو آهي ۽ صورتحال اڳ کان وڌيڪ خراب ٿي رهي آهي۔ شهرين مطالبو ڪيو آهي ته وڌندڙ بدامني کي ختم ڪيو وڃي ۽ سنجي ڪمار جي قتل ۾ ملوث جوابدارن کي گرفتار ڪيو وڃي۔ ٻئي طرف، ايس ايس پي لاڙڪاڻه احمد فيصل چوڌري جو چوڻ آهي ته جلد واقعي ۾ ملوث جوابدار قانون جي گرفت ۾ هوندا ۽ پوليس جي ڌاڙيلن خلاف ڪارروائي جاري آهي.