نئين دهلي (ويب ڊيسڪ) بنگلاديش جي معزول وزيراعظم شيخ حسينه واجد جلاوطني دوران پنهنجي حامين سان ورچوئل خطاب ۾ عزم ظاهر ڪيو آهي ته هوءَ واپس ايندي ۽ انهن عوامي ليگ جي ڪارڪنن ۽ پوليس اهلڪارن جي خون جو بدلو وٺندي، جن کي هوءَ سياسي تشدد جا ”شهيد“ قرار ڏئي ٿي.
شيخ حسينه 5 آگسٽ تي اقتدار مان بيدخل ٿيڻ بعد ڀارت ۾ جلاوطن آهي، ميڊيا موجب شيخ حسينه اڻڄاتل هنڌ تان وڊيو لنڪ ذريعي خطاب دوران پنهنجي حامين کي صبر ۽ اتحاد جي اپيل ڪندي چيو ته ”مان واپس اينديس، پنهنجي شهيدن جو بدلو وٺنديس. مان اڳ به انصاف ڪري چڪي آهيان ۽ ٻيهر به ڪنديس، هي منهنجو واعدو آهي.“
هن نوبل انعام يافته ۽ موجوده عبوري حڪومت جي چيف ايڊوائزر محمد يونس تي سنگين الزام هڻندي ان کي ”دهشتگرد“قرار ڏنو ۽ چيو ته الله مونکي ٻي زندگي ڏني آهي، مونکي يقين آهي ته اهو ڪنهن مقصد تحت ٿيو آهي، انهن مونکي اڳ به قتل ڪرڻ جي ڪوشش ڪئي ۽ 5 آگسٽ تي به منهنجو قتل ڪرڻ جي سازش ڪئي وئي پر مان بچي ويس، صرف ان جي لاءِ ته مان واپس اچي سگهان ۽ انصاف ڪري سگهان، الله اسان سان گڏ آهي.“
سندس چوڻ هو ته محمد يونس کي حڪومت هلائڻ جو ڪو به تجربو نه آهي، ان تمام انڪوائري ڪميٽيون ختم ڪري دهشتگردن کي کليل ڇوٽ ڏئي ڇڏي آهي، اهي بنگلاديش کي تباهه ڪري رهيا آهن. اسان هن دهشتگرد حڪومت کي پاڙئون پٽينداسين.