اسلام آباد (ويب ڊيسڪ) ايف آءِ اي جا آفيسر انساني سمگلنگ ۾ ملوث هجڻ جو انڪشاف ٿيو آهي، جنهن جا تفصيل سينيٽ ۾ پيش ڪيا ويا، رپورٽ موجب گذريل ٽن سالن ۾ 51 آفيسر انساني سمگلرن سان رابطو رکڻ تي برطرف ڪيا ويا آهن.
گهرو وزارت جي رپورٽ موجب سال 2022 ۾ 6 آفيسرن کي نوڪري تان لاٿو ويو، جڏهن ته 2023 ۾ وڌيڪ 4 آفيسرن کي برطرف ڪيو ويو، 2024 ۾ سڀ کان وڌيڪ 41 آفيسرن کي نوڪرين تان هٽايو ويو.
ذريعن جو چوڻ آهي ته انهن آفيسرن تي غير قانوني طور ماڻهن کي ٻاهرئين ملڪ موڪلڻ ۽ انساني سمگلنگ جي نيٽ ورڪس سان سهڪار جا الزام هئا.
اختيارين موجب انساني سمگلنگ خلاف سخت ڪارروائي جاري رهندي ۽ اهڙن عنصرن خلاف وڌيڪ جاچ ڪئي ويندي.