اسلام آباد(بيورو رپورٽ) خيبر پختونخواهه جي گورنر فيصل ڪريم ڪنڊي کي تبديل ڪرڻ جو امڪان آهي. ذريعن موجب خيبرپختونخواهه جي نئين گورنر لاءِ ڇهه نالا غور هيٺ آهن، جن ۾ ٽي سياسي شخصيتون ۽ ٽي اڳوڻا فوجي آفيسر شامل آهن. ذريعن جو چوڻ آهي ته سياسي شخصيتن ۾ امير حيدر خان هوتي، آفتاب شيرپائو ۽ پرويز خٽڪ جا نالا غور هيٺ آهن. ذريعن موجب ڪي پي جي گورنر جي عهدي لاءِ ليفٽيننٽ جنرل (ر) خالد رباني، ليفٽيننٽ جنرل (ر) غيور محمود ۽ ليفٽيننٽ جنرل (ر) طارق خان جا نالا به غور هيٺ آهن. ليفٽيننٽ جنرل (ر) غيور محمود، ليفٽيننٽ جنرل (ر) طارق خان اڳوڻي آءِ جي ايف سي هئا جڏهن ته ليفٽيننٽ جنرل (ر) خالد رباني اڳوڻي ڪور ڪمانڊر پشاور هو.فيصل ڪريم ڪنڊي خيبر پختونخوا جي گورنر جي حيثيت سان ڪيل تبديلين بابت پنهنجي لاعلمي جو اظهار ڪيو آهي.پشاور مان جاري ڪيل هڪ بيان ۾ فيصل ڪريم ڪنڊي چيو ته کيس صوبي ۾ گورنر جي تبديلي جي خبر ناهي، هن چيو ته پارٽي جيڪو به فيصلو ڪندي اهو قبول ڪندو.هن چيو ته جيڪڏهن ميڊيا خيبرپختونخواهه جو گورنر لڳائيندو ته الله حافظ آهي، گورنر جي تبديلي بابت پارٽي جيڪو به فيصلو ڪندي، مان ان کي قبول ڪندس.