ايلون مسڪ جي ڪمپني ايڪس اي آئي نئون هٿرادو ذهانت (اي آئي) ماڊل گروڪ 3 متعارف ڪرائي ڇڏيو.
ايلون مسڪ جي دعويٰ آهي ته هي هيل تائين دنيا ۾ متعارف ڪرايو ويندڙ سڀ کان سمارٽ اي آئي چيٽ بوٽ آهي، جنهن جو مقابلو ٻيا چيٽ بوٽ نٿا ڪري سگهن.
هن ايڪس (ٽوئيٽر)تي هڪ پوسٽ ۾ ٻڌايو ته گروڪ 3 اڳ کان وڌيڪ طاقتور ۽ تيز رفتار آهي ۽ ان کي ڊگهي تربيت ڏني وئي آهي.
هن وڌيڪ ٻڌايو ته هن نئين ماڊل سان توهان کي وقت بچائڻ ۾ مدد ملندي، هاڻي جيڪو ڪم ويب يا سوشل ميڊيا تي اڌ کان هڪ ڪلاڪ ۾ ٿيندو آهي، اهو گروڪ 3 جي ذريعي 10 منٽن ۾ ممڪن ٿي سگهندو.
ايڪس اي آئي موجب گروڪ 3 اڳوڻي ماڊل گروپ 2 کان 10 ڀيرا وڌيڪ طاقتور آهي.
ڪمپني دعويٰ ڪئي آهي ته گروڪ 3 ڪارڪردگي جي لحاظ کان هن وقت موجود ٻين چيٽ بوٽس بشمول چيٽ جي پي ٽي، ديپ سيڪ کان وڌيڪ بهتر آهي.
هن نئين اي آئي ماڊل کي ايڪس اي آئي جي سپر ڪمپيوٽر Colossus تيار ڪيو آهي، جنهن کي دنيا جي ڪجهه وڏن سپر ڪمپيوٽرز مان هڪ مڃيو وڃي ٿو.
ايلون مسڪ ٻڌايو ته جيڪڏهن توهان گروڪ 3 کي استعمال ڪندئو ته توهان روزاني جي بنياد تي ان ۾ بهتري محسوس ڪندئو، ڇو جو اسان مسلسل ان کي بهتر بڻائي رهيا آهيون.
ڪمپني موجب گروڪ 3 بعد گروڪ 3 مني کي به متعارف ڪرايو ويندو پر ان ۾ محدود فيچرز دستاب هوندا.
اهو هر مهيني 22 ڊالرز فيس ادا ڪندڙ ايڪس جي پريميم پلس واهپيدارن کي دستياب هوندو، جنهن جي لاءِ انهن کي اڳ ايڪس جي نئين ورزن کي اپ ڊيٽ ڪرڻو پوندو.
ايڪس اي آئي طرفان ماهوار 30 ڊالرز تي ٻڌل سپر گروڪ سبسڪرپشن به متعارف ڪرائي ويندي.