ميڪيسڪو جي حڪومت گوگل خلاف قانوني ڪارروائي جي ڌمڪي ڏني آهي، جنهن ”گلف آف ميڪسيڪو“ جو نالو آمريڪي واهپيدارن جي لاءِ ”گلف آف آمريڪا“ ڪري ڇڏيو آهي.
ميڪسيڪو جي صدر ڪلاڊيا شينبام چيو آهي ته جيڪڏهن گوگل نالي جي تبديلي واپس نه ورتي ته ان جي حڪومت عدالت سان رابطو ڪندي.
صدر وضاحت ڪئي ته آمريڪي صدر ڊونلڊ ٽرمپ جي ايگزيڪيوٽو آرڊر تحت هي نالو صرف آمريڪي پاڻين تي لاڳو ٿئي ٿو، پر ميڪسيڪو ۽ ڪيوبا جي سامونڊي علائقن کي شامل ڪرڻ غلط آهي، گوگل وضاحت ڏئي ته هي صرف آمريڪي واهپيدارن لاءِ ڪيو ويو آهي ۽ ٻين ملڪن ۾ ٻئي نالا نظر نه ايندا.
ميڪسيڪو جي حڪومت گوگل کي هڪ ٻيو خط لکي مطالبو ڪيو ته ”گلف آف آمريڪا“ جو نالو صرف آمريڪي پاڻين تائين محدود رکيو وڃي.
شينبام چيو ته ”جيڪڏهن آمريڪا پنهنجي پاڻين جو نالو تبديل ڪرڻ چاهي ٿو ته شايد ان کي پنهنجو ملڪ ميڪسيڪن آمريڪا به چوڻ گهرجي“.
ميڪسيڪو گوگل کي حتمي وارننگ ڏني آهي ته جيڪڏهن مسئلو حل نه ٿيو ته عدالت سان رابطو ڪيو ويندو.
ٻئي طرف ايپل به ٽرمپ جي حڪم تي عمل ڪندي پنهنجي نقشن ۾ ”گالف آف آمريڪا“ جو نالو شامل ڪري ورتو، جنهن سان تڪرار وڌيڪ وڌي ويو.
عالمي ماهرن جو چوڻ آهي ته گوگل طرفان ان تبديلي جو لاڳو ڪرڻ هڪ سياسي قدم آهي، جنهن تي وڌيڪ ڇڪتاڻ پيدا ٿي سگهي ٿي.