واشنگٽن- آمريڪي صدر ڊونلڊ ٽرمپ چيو آهي ته روس ۽ چين سان ايٽمي هٿيارن تي ضابطو آڻڻ لاءِ ڳالهيون ٻيهر شروع ڪرڻ چاهيون ٿا. اميد آهي ته آخرڪار ٽيئي ملڪ پنهنجي وڏي دفاعي بجيٽ کي اڌ تائين گهٽ ڪرڻ تي راضي ٿي ويندا. پرڏيهي خابرو اداري مطابق پنهنجي آفيس ۾ صحافين سان ڳالهائيندي ڊونلڊ ٽرمپ آمريڪا جي ايٽمي دفاع تي سوين بلين ڊالر خرچ ڪرڻ تي افسوس جو اظهار ڪيو ۽ چيو ته هو پنهنجي خرچن ۾ گهٽتائيءَ لاءِ آمريڪي مخالفن سان واعدو ڪرڻ جي اميد رکي ٿو. هن جو چوڻ هو ته اسان وٽ اڳ ئي تمام گهڻا ايٽمي هٿيار آهن جن سان اسان دنيا کي 50 نه پر 100 ڀيرا کان به وڌيڪ تباهه ڪري سگهون ٿا. ان باوجود اسان نوان ايٽمي هٿيار بڻائي رهيا آهيون ۽ روس ۽ چين به ائين ڪري رهيا آهن. آمريڪي صدر چيو ته اسان وٽ نوان ايٽمي هٿيار ٺاهڻ جو ڪو جواز ناهي، نَوان ايٽمي هٿيار ٺاهڻ تي اسان سڀ تمام گهڻو پئسو خرچ ڪري رهيا آهيون جيڪي اسان ٻين اهڙين شين تي خرچ ڪري سگهون ٿا جن تي حقيقت ۾ خرچ ڪرڻ جي ضرورت آهي. هن چيو ته آمريڪا ۽ روس وٽ سرد جنگ کانپوءِ ايٽمي هٿيارن جا وڏا ذخيرا موجود آهن. 5 ۽ 6 سالن ۾ چين به اسان جي سطح تي اچي ويندو، جيڪڏهن ڪڏهن ايٽمي هٿيارن جي استعمال جو موقعو پيدا ٿيو ته شايد اسان زندهه نه بچي سگهون. صدر چيو ته هو وچ اوڀر ۽ يوڪرين جي مسئلن کي حل ڪرڻ کانپوءِ چين ۽ روس ٻنهي سان ايٽمي ڳالهين ڪرڻ جي ڪوشش ڪندو ۽ ٻنهي کي فوجي بجيٽ ۾ ڪٽوتي ڪرڻ جي تجويز ڏيندو. اميد آهي ته اسان گڏجي اهو ڪرڻ جي قابل ٿي وينداسين.