ڪراچي (ويب ڊيسڪ) صوبائي وزير ناصر شاهه سنڌ ۽ پنجاب حڪومت جي ترجمانن جي بيانن تي ردعمل ڏنو آهي.
ناصر شاهه چيو ته سنڌ ۽ پنجاب جون حڪومتون پنهنجي پنهنجي قيادت جي رهنمائي ۾ عوام جي ڀلائي لاءِ ڪم ڪري رهيون آهن، صوبائي حڪومتن وچ ۾ ڪو مقابلو ناهي.
هن چيو ته جيڪڏهن سنڌ حڪومت وفاق کان ڪنهن منصوبي تي عملدرآمد جو مطالبو ڪري ٿي ته اهو آئيني حق آهي، پنجاب ۾ وفاقي منصوبا جاري آهن، جن تي سنڌ حڪومت ڪڏهن اعتراض نه ڪيو.
سندس چوڻ هو ته اسان چاهيون ٿا جيئن ٻين صوبن کي وفاق جا منصوبا ڏنا ويندا آهن، ائين ئي سنڌ کي به ان جو جائز حق ملي، ان تي اعتراض نه ٿيڻ گهرجي، اسان نٿا چاهيون ته غير ضروري بيانن سان تڪرار پيدا ڪيا وڃن.
ناصر شاهه چيو ته اسان مريم نواز کي عزت ۽ قدر جي نگاهه سان ڏسون ٿا، هوءَ بهترين ڪم ڪري رهي آهي ۽ سندس سٺن ڪمن کي ساراهيون ٿا.