واشنگٽن(ويب ڊيسڪ)آمريڪا جي ترجمان سومر تي اعلان ڪيو آهي ته سعودي عرب جو ولي عهد شھزادو محمد بن سلمان 18 نومبر تي وائٽ هائوس ۾ آمريڪا جي صدر ڊونلڊ ٽرمپ سان ملاقات ڪندو. هي دورو ان وقت ٿي رهيو آهي، جڏهن ٽرمپ سعودي عرب تي زور ڏئي رهيو آهي ته اهو به انهن ملڪن جي فهرست ۾ شامل ٿئي جيڪي “ابراهام معاهدي” (Abraham Accords) ۾ شامل ٿيا آهن. ياد رهي ته 2020ع ۾ ٽرمپ متحده عرب امارات، بحرين، سوڊان ۽ مراڪش سان اسرائيل سان لاڳاپا معمول تي آڻڻ جا معاهدا ڪيا هئا. سعودي عرب اڃا تائين فلسطيني رياست جي قيام بابت واضح قدمن جي غير موجودگي ۾ معاهدي ۾ شامل ٿيڻ کان هٻڪ محسوس ڪري رهيو آهي. ٽرمپ، سي بي ايس جي پروگرام “60 منٽس” ۾ آچر ڏينهن نشر ٿيل هڪ انٽرويو ۾ چيو ته، کيس يقين آهي ته آخرڪار سعودي عرب به انهن معاهدن ۾ شامل ٿيندو. آمريڪي صدر هن مهيني جي شروعات ۾ پڻ چيو هو ته ابراهام معاهدي ۾ وڌيڪ ملڪن جي شموليت جلد متوقع آهي ۽ کيس اميد آهي ته سعودي عرب به ان جو حصو بڻجندو. ٽرمپ آگسٽ ۾ پڻ زور ڏنو هو ته وچ اوڀر جا ملڪ انهن معاهدن ۾ شامل ٿيڻ جي اهميت سمجهن. ٽرمپ ۽ ولي عهد جي ملاقات دوران آمريڪا-سعودي دفاعي معاهدي تي به ڳالهه ٿينديون. فائنانشل ٽائيمز 2 هفتا اڳ رپورٽ ڪيو هو ته ٻئي ملڪ اميد رکن پيا ته محمد بن سلمان جي دوري دوران اهڙو معاهدو ٿي سگهي ٿو. هڪ سينيئر ٽرمپ انتظاميا جي عملدار روئٽرز کي ٻڌايو ته “ولي عهد جي اچڻ موقعي تي ڪجهه دستخط ٿيڻ بابت ڳالهيون ٿي رهيون آهن، پر تفصيل اڃا حتمي نه آهن.” سعودي عرب طرفان آمريڪا کان بادشاهت جي حفاظت لاءِ رسمي ضمانتون ۽ جديد هٿيارن تائين رسائي جي به خواهش ظاهر ڪئي وئي آهي. سعودي عرب آمريڪي هٿيارن جو سڀ کان وڏو خريدارن مان هڪ آهي، ۽ ٻنهي ملڪن جي وچ ۾ ڊگهي عرصي کان لاڳاپا قائم آهن، جن جي بنياد تي سعودي عرب تيل فراهم ڪري ٿو ۽ آمريڪا سلامتي ڏئي ٿو. گذريل مئي ۾ ٽرمپ جي رياض واري دوري دوران آمريڪا سعودي عرب کي اٽڪل 142 ارب ڊالر ماليت جا هٿيار وڪڻڻ تي راضي ٿيو هو. ان وقت ٽرمپ محمد بن سلمان جي 600 ارب ڊالر جي سيڙپڪاري جي واعدي کي به ڀليڪار ڪيو هو ۽ مذاق ۾ چيو هو ته “اها رقم هڪ ٽريلين ڊالر هئڻ گهرجي.”