لاهور: (ويب ڊيسڪ) وفاقي اطلاعات واري وزير عطاءُالله تارڙ چيو آهي ته پي ٽي آءِ باني عمران خان جو ڀينرون ڀارتي چينلز تي ملڪ کي بدنام ڪري رهيون آهن. انهن کي ٻڏي مرڻ گهرجي.صحافين سان ڳالهيون ڪندي عطاءُالله تارڙ چيو ته پي ٽي آءِ باني عمران خان شهباز شريف تي ڪوڙو الزام لڳايو هو، عدالت ۾ پيش ٿي پي ٽي آءِ جي وڪيل سوالن جو جواب ڏنو. پي ٽي آءِ باني شهباز شريف تي الزام مختلف فورمز ٻيهر ورجايا. هن چيو ته پي ٽي آءِ باني جا جيترا فيصلا هئا اهي شرافت جو لباس پائي سندس گهر واري ڪندي هئي. سمورا معاشي ۽ سياسي فيصلا به انهي جي گهر واري ڪندي هئي. اڄ سموري دنيا چئي رهي آهي ته باني جي فيصلن جي پٺيان ڪوڙ ۽ ڪوڙن الزامن جو هڪ هٿ ٺوڪيو نظام هو.هن چيو ته پي ٽي آءِ باني 2017ع جي ڌرڻن دوران به ڪوڙا الزام لڳايا، پي ٽي آءِ باني بشريٰ بي بي جي چوڻ تي حڪومتي فيصلا ڪندو هو پي ٽي آءِ باني جي سياست منافقت، ڪوڙ ۽ الزامن کان سواءِ ڪجهه به نه هئي.وفاقي وزير چيو ته وانا ڪيڊٽ ڪاليج جو واقعو، اي پي ايس پشاور سان وڏو سانحو ٿي سگهيو ٿي، وانا ۾ پاڪ فوج ڪامياب آپريشن ڪري 500 کان وڌيڪ شاگردن کي بازياب ڪرايو. وانا ڪيڊٽ ڪاليج تي پاڪ فوج مهارت ۽ بهادري سان آپريشن ڪيو. اسان جي پاڪ فوج ۽ فورسز تعريف جي لائق آهن. هن چيو ته پاڪستان هميشه کان امن جو خواهشمند آهي. اسان هر دهشتگرد جو پيڇو ڪري رهيا آهيون ڪنهن جي پسند ۽ ناپسند سان فيصلا نه ٿيندا، ملڪ آئين ۽ قانون جي تحت هلي رهيو آهي.وفاقي وزير چيو ته پي ٽي آءِ جو مطالبو غير قانوني آهي، هي ڪجهه ماڻهو آهن جيڪي روز امن امان جي خراب صورتحال پيدا ڪندا آهن. امن امان جي صورتحال خراب ڪري ڪنهن سان ملاقات نٿي ٿي سگهي، پي ٽي آءِ جا سمورا سوشل اڪائونٽس ڀارت ۽ افغانستان مان هلي رهيا آهن هي ماڻهو ڀارت ۽ افغانستان مان مهم هلائي پاڻ کي ايڪسپوز ڪري رهيا آهن اهي ماڻهو دشمنن سان گڏجي سازشون ڪندا آهن، گارين واري مهم ۽ الزامن سان ڪوبه فرق نٿو پوي.هن چيو ته هزارن جي تعداد ۾ نان ڪسٽم پيڊ گاڏيون ڪي پي ڪي ۾ هلي رهيون آهن، پي ٽي آءِ جي صوبائي حڪومت نان ڪسٽم پيڊ گاڏين جو سبب نه ڄاڻائي سگهيون آهن. ڪي پي ڪي جي صوبائي حڪومت ناڪام ٿي چڪي آهي. انهن جي ڪارڪردگي ٻڙي آهي. پي ٽي آءِ جو ملڪ دشمنن سان ڳٺ جوڙ بي نقاب ٿي چڪو آهي. ڪي پي ڪي ۾ وڏو ڊرگ مافيا موجود آهي اڄ به ڪي پي ڪي ۾ پهاڙ ڪٽيا پيا وڃن، کاڻن جا غير قانوني ٺيڪا هلي رهيا آهن.هن چيو ته پي ٽي آءِ جي حڪومت ڊرگ اسمگلنگ کي پروموٽ ڪري رهي آهي تمباڪو مافيا جيڪڏهن ٽيڪس ڏيڻ شروع ڪندي ته 500 ارب جو ٽيڪس جمع ٿي سگهي ٿو. ڪي پي ڪي ۾ اقتدار ۾ اچي ماڻهن جا کيسا ڀريا ويندا آهن. هن چيو ته ڪوبه دهشتگرد انهي تي حملو نٿو ڪري جنهن جو ڊرگ جو واپار هوندو آهي. نان ڪسٽم پيڊ گاڏين خلاف ڪارروائي صوبائي حڪومت کي ڪرڻي آهي. افغانستان مان پاڪستان تي حملا ٿيندا آهن ۽ اهي ماڻهو افغان حڪومت جا ترجمان بڻيل آهن. محمود خان اچڪزئي اسيمبلي ۾ بيهي صرف ڪابل ڪابل جي ڳالهه ڪئي، اسان جي هٿياربند فوج سرحدن جي حفاظت ڪري رهي آهي.وفاقي اطلاعات واري وزير چيو ته پي ٽي آءِ جون 3 ڀينرون 9 مئي تي به ڪور ڪمانڊر هائوس ۾ موجود هيون. پي ٽي آءِ باني جون ٽئي ڀينرون جٿن کي کڻي ڪور ڪمانڊر هائوس ۾ موجود هيون، جنهن جون شاهديون به موجود آهن. ڀارت ۽ افغانستان جي چينلز تي وڃي پي ٽي آءِ باني جون ڀينرون انٽرويو ڏينديون آهن. ڀارتي چينلز تي وڃي اهي ماڻهو ملڪ کي بدنام ڪري رهيا آهن. اهو ٻڏي مرڻ جو مقام آهي.عطاءُالله تارڙ چيو ته سزا يافته شخص جي لاءِ اوهان ڀارتي ميڊيا تي وڃي انٽرويو ڏيندا آهيو، ڀارتي ميڊيا ۽ افغان ميڊيا تي اڄ پروپيگنڊا ڪئي پئي وڃي، پي ٽي آءِ باني جون ڀينرون ڪاش ڀارتي ميڊيا تي مودي جي مذمت ڪن ها. هن چيو ته ڪي پي ڪي جي وڏي وزير جو منشيات فروشن سان تعلق آهي. ڪي پي ڪي حڪومت اربين روپين جو ٽيڪس کائي ويندي آهي. ڪي پي ڪي جو وڏو وزير اڊياله جيل جي ٻاهران نعرا لڳائيندو آهي، جڏهن افغانستان جي طرفان دهشتگردانه ڪارروائي ٿي ته اسان جي فوج انهي جو ڀرپور جواب ڏنو. انهي تي پوري پي ٽي آءِ کي افسوس ۽ ڏک ٿيو.اطلاعات واري وزير چيو ته 9 مئي تي حملو فوج کي ڪمزور ڪرڻ جي لاءِ هو. 9 مئي جو منصوبو ناڪام ٿيو انهن کي زبردست شڪست ملي، هي چاهين ٿا ته فوج اندروني طور تي ڪمزور ٿئي پراهو به انهن جو منصوبو ناڪام ٿيو.