اسلام آباد: (بيورو رپورٽ) سپريم ڪورٽ ۾ منشيات ڪيس جي جوابدار جي ضمانت واري درخواست تي ٻڌڻي ٿي، جنهن ۾ جسٽس جمال مندوخيل جي سربراهي ۾ ٻه رڪني بينچ ڪيس جي ٻڌڻي ڪئي. تفصيل موجب ٻڌڻي جي دوران جسٽس جمال مندوخيل منشيات سپلاءِ نه روڪڻ تي سرڪاري ادارن تي ڪاوڙ جو اظهار ڪيو. جسٽس جمال مندوخيل ريمارڪس ڏنا ته منشيات شهرين تائين آخر پهچي ڪيئن ٿي؟، هن چيو ته بارڊر تي منشيات کي ڇو نٿو روڪيو وڃي؟ بارڊر تان هڪ هڪ هزار ڪلو ميٽر تائين منشيات اندر ڪيئن اچي ويندي آهي؟ پنج 10 ڪلو جو مسئلو ناهي پر ٽنن جي حساب سان منشيات ايندي آهي.جسٽس جمال مندوخيل اهو به چيو ته طالبان افغانستان ۾ منشيات جون فيڪٽريون بند ڪيون ته هتي شروع ٿي ويون، بلوچستان جي ٽن ضلعن ۾ منشيات جون فصلون پوکيون پيون وڃن. هن وڌيڪ چيو ته سڀني کي خبر آهي پر ڪير به ڪارروائي لاءِ تيار نه آهي. اي اين ايف جو ڪم ڪلو ڪلو منشيات پڪڙڻ نه پر سپلائي لائن کي ڪٽڻ آهي، ننڍيون وڏيون ڪارروايون ته شهرن ۾ پوليس به ڪندي رهندي آهي.سپريم ڪورٽ جي جج چيو ته اهو ضياءُالحق جو ڏنل تحفو آهي، هاڻ ڀوڳيو انهي کي، جنهن کان پوءِ عدالت ڪوريئر ڪمپني جي مئنيجر جي ضمانت واري درخواست تي ٻڌڻي ملتوي ڪري ڇڏي. جج اي اين ايف کي جوابدار جي سي سي ٽي وي فوٽيج پيش ڪرڻ جي هدايت ڏني آهي.